Demîrtaş : Cemîl Çîçek wê 12'ê Îlonê fêrî Kurdî bibe

COLEMÊRG - Hevserokê BDP'ê Selahttîn Demîrtaş, bi parlamenterên heremê re ji 20 hezar kesî re axivî û banga boykotkirina referandûma 12'ê ‘Îlonê kir.

BDP'ê di çarçoveya kampanyaya boykotkirina referandûma 12'ê Îlonê de yekemîn mitinga xwe li Colemêrgê bi beşdarbûn Hevserokê BDP'ê Selahattîn Demîrtaş û parlamenterên BDP'ê yên heremê Hamît Geylanî, Pervîn Buldan, Nurî Yaman, Fatma Kurtulan û Ozdal Uçer, li dar xist. Konvoya BDP li mewqiya Çîftlîkê ku 20 kîlometreyan dûrê Colemêrgêye bi pankarta "Hûn bi xêr hatin keleha berxwedanê" û "Em AKP'ê naxwazîn, em demokratîkbûyînê dixwazin" hate pêşwazîkirin. Polîs û tîmên taybet li derdora qada mitîngê tedbîrên berfireh girtin.

Hevserokê BDP'ê Salahattîn Demîrtaş, piştî di nava girseya mezin re derbas bû û bi zorê xwe gîhand ber Şaredariyê ku lê mîting pêk hat. Dema Demîrtaş dest bi axaftinê kir girseyê bi yek dengî dirûşmeya Bijî Serok Apo", "Êrîş me bêzar nakin", "Ev gel bi we serbilind e" berz kirin. Girseyê di pêşwazîkirinê de pankartên "Gelê Colemêrgê we silav dike", "Hûn bi xêr hatin Colemêrgê", "Em makezagona demokratîk dixwazin", "Em naçin sindoqê, Em wê boyot bikin" vekirin. Demirtaş, girse bi Kurdî silav kir û dest bi axaftinê kir. Demîrtaş, diyar kir ku AKP dixwaze makezagona xwe ava bike û makezagona nijadperest û darbeya 12'ê Îlonê bi gel bide erê kirin. Demirtaş, anî ziman ku êdî gel vê makezagonê qebûl nake û wiha got: "Edî ev gel di vê makezagonê de hilnayê. AKP'ê daxwazên BDP'ê û gelê Kurd qebûl nekir. Me xwest em polîtîkayên înkar û asîmîlasyonê biguherin. Lê hikumeta AKP'ê bi vê nêzîkatiya xwe dirûtiya xwe nîşanî me da. Gelê Kurd ji çanda berxwedan û têkoşînê hatiye. Wê bersîva AKP, CHP û MHP'ê di 12'ê ilonê de dibe. Gelê kurd wê vê makezagona 12'ê îlonê têxe gorê. Ji bo daxwazên gel di vê makezagonê de tune em boykot dikin. Divê li herêmê tu deng ji sindoqan dernekeve. Dema di 12'ê îlonê de sindoq vala derkevin wê demê Cemîl Çîçek wê fêrî Kurdî bibe. Wê bêje 'Vay limin'. "

Demîrtaş diyar kir ku ew ji bo piştgiriyê bidin gelê xwe çûbûn Dortyolê û wiha got: "Lê dewletê û hikûmetê pêşiya me bi awayekî bê hiquqî girtin. Serokwezîr dibêje 'Çi karê te li wir heye' Birêz Serokwezîr BDP ji te fermanê nagire. Siyasetê ferî BDP'ê neke. BDP dikare biçe her derê. Ji ber te dengê gelê rastî êrîşên nijadperst hat nebihîst em çûn wir. Nîjadperestan li kolanan bûyer derxistin û avahiya partiya me şewitand. Lê polîsan ji xwe re temaşe kir. Heke gelê me û partiya me di mijara aştiyê de samîmî nebe wê li vî welatî şerê navxweyî dest pê bike."

Demîrtaş, da zanîn ku di pêvajoya hewildanê de, 30 hevalên wan hatine binçavkirin û xwest ku ev demildest serbest bên berdan.



ANF NEWS AGENCY